domingo, 15 de xaneiro de 2017

Bombóns de caramelo ao chocolate

Estes Reis regaláronme o libro "Enciclopedia del Chocolate" (Editorial Blume) de "École du grand chocolat Valrhona" e faltábame tempo para probar algunha das receitas. Escollín esta para empezar porque me pareceu fácil. Hai que ter moito coidade cando engadimos a nata ao caramelo xa que pode saltar, polo demais non ten moita dificultade. Os bombóns quedan moi ricos e non moi empalagosos, o chocolate negro contrarresta moi ben a cantidade de azucre que levan.


Ingredientes:

250 g de azucre, 15 g de mel, 15 g de manteiga, 250 ml de nata para montar, 150 g de chocolate do 70% un chisco de sal.


Elaboración:


  1. Poñer o azucre e o mel nunha tarteira a lume suave ata que caramelice.
  2. Quentar a nata co chisco de sal.
  3. Cando o azucre e o mel estean caramelizados engadir pouco a pouco, con moito coidado, a nata quente. Remexer e manter ao lume.
  4. Fundir o chocolate no microndas, quentando de 30 en 30 segundos e remexendo cada vez ata que estea totalmente fundido.
  5. Quentar o caramelo coa nata ata 115ºC e botar a mestura enriba do chocolate fundido. Remexer ata ter unha mestura homoxénea.
  6. Engadir a manteiga en cubiños e remexer ata que estea integrada.
  7. Poñer a mestura en pequenos moldes de silicona e deixar na neveira ata que os bombóns estean un pouco duros.




Dificultade: Media
Tempo aporximado: 45 minutos
Alérxenos:

venres, 30 de decembro de 2016

"Tatín" de patacas e tomate

Volvo ás receitas de Yotam Ottolenghi, en concreto do seu libro "El gourmet vexetariano". Esta é unha receita que quería facer dende hai tempo pero cando atopaba patacas do tamaño axeitado non tiña tempo e cando o tiña non había patacas pequenas. Por fin puiden facela e aquí está o resultado.



Ingredientes:

200 g de tomates "cherry" , 500 g de patacas moi pequenas, 1 cebola, 150 g de queixo de cabra fresco, 10 g de manteiga, 40 g de azucre, aceite de oliva virxe extra, ourego, sal e pementa negra moída, unha lámina de masa follada sen glute.

Elaboración:


  1. Cortar os tomates pola metade e poñelo nunha bandexa do forno cuberta con papel sulfurizado.
  2. Botarlles sal, pementa e un pouquiño de aceite.
  3. Meter a bandexa no forno a 130ºC durante 45 minutos.
  4. Lavar as patacas e poñelas a cocer, coa pel, en auga salgada uns 25 minutos.
  5. Cando estean cocidaaas deixar arrefriar, cortar as puntas e despois cortalas en toros duns 2 cm.
  6. Cortar en xuliana a cebola e pochala nunha tixola cun poquiño de aceite e sal.
  7. Poñer nun cazo a manteiga e o azucre. Quentar a lume suave ata ter un xarope escuro.
  8. Forrar con papel sulfurizado o fondo dun molde duns 22 cm de diámetro. Untar cun pouco de aceite e repartir o xarope pola superficie.
  9. Colocar os anacos de patacas cubrindo a superficie do molde.
  10. Nos ocos que quedan entre as patacas meter os tomates e a cebola. Botar un pouco de ourego por enriba.
  11. Cortar o queixo en láminas finas e cubrir as verduras.
  12. Cubrir coa lámina de masa follada e metela no molde cubrindo as patacas.
  13. Cociñar no forno a 200ºC durante uns 20 minutos, baixar a temperatura a 180ºC ata que a masa estea feita.
  14. Dar a volta ao molde sobre un prato.
  15. Servir a tarta quente ou morna.



Dificultade: Media
Tempo aproximado: 1 hora e 45 minutos
Alérxenos:




mércores, 14 de decembro de 2016

Turrón de guirlache

Este turrón é moi fácil de facer, na receita puxen dificultade media porque hai que ter moito coidado ao facer o caramelo, o mellor é non separarse da cociña ata que estea feito porque é moi fácil que se queime. Ademais hai que ter moito coidado ao manexalo xa que a temperatura que alcanza é moi alta. Salvo estas dúas precaucións é unha receita moi fácil. Outra cousa para ter en conta é que o turrón debe consumirse en pouco tempo xa que enseguida se pon pegañento.




Ingredientes:

250 g de améndoa pelada sen sal, 250 g de azucre, 25 g de azucre invertido.

Elaboración:


  1. Poñer as améndoas nunha tixola onde non se amontoen e torralas a lume baixo.
  2. Cando as améndoas empecen a coller cor retiralas do lume e reservar.
  3. Poñer os azucres nun cazo a lume suave.
  4. Vixiar mentres se van quentando os azucres e se caramelizan.
  5. Ir controlando a temperatura e retirar do lume cando o caramelo chegue a 190ºC.
  6. Nese momento engadir as améndoas e remexer para que se cubran de caramelo.
  7. Pasar a mestura a moldes de silicona do tamaño e forma que se queira.
  8. Deixar arrefriar e sacar dos moldes.



Dificultade: Media
Tempo aproximado: 1 hora
Alérxenos:

domingo, 27 de novembro de 2016

Bacallau en salsa verde

A salsa verde é moi fácil de preparar en teoría, pero hai que collerlle o punto para que quede rica, creo que sobre todo hai que engadir moito allo e perexil, e mellor usar un fumet que auga. Había moito, moito tempo que no facia esta salsa e como tiña un bacallau na neveira pensei que seguro que estaba rico preparado desta maneira, e acertei, volverei a repetilo.





Ingredientes:

4 dentes de allo grandes, unha boa presa de perexil fresco, 4 patacas medianas, unha presa de espárragos trigueiros, 4 anacos de bacallau de ración e desalgado, aceite de oliva virxe extra, 1 culleriña de amidón de millo (opcional), 1 litro de fumet*.


Elaboración:


  1. Poñer o fumet a ferver.
  2. Cortar o bacallau en dados reservar.
  3. Picar os dentes de allos moi finos.
  4. Poñer nunha tarteira un pouco de aceite e botar nela o allo picado.
  5. Poñer a lume suave.
  6. Picar moi fino o perexil.
  7. Cando o allo empece a "saltar" engadir o perexil, remexer e retirar a tarteira do lume para que non se queime.
  8. Pelar e cortar as patacas en toros dun centímetro de grosor.
  9. Engadir as patacas á tarteira, remexer e poñer ao lume suave.
  10. Engadir o fumet para que cubra as patacas.
  11. Deixar ferver a lume suave.
  12. Cando as patacas estean feitas colocar o bacallau por enriba delas e deixar que se faga.
  13. Unha vez feito o bacallau probar e rectificar de sal se é necesario.
  14. Se se prefire a salsa un pouco máis espesa pode engadirse unha culleriña de amidón de millo disolta nun pouco de auga fría.




Dificultade: Fácil.
Tempo aproximado: 1 hora.
Alérxenos:
*Neste caso o fumet estaba feito só con peixe, coidado se tamén elaborouse con moluscos e crustáceos