Esta tortiñas levan ingredientes moi sinxelos que sempre temos na casa , aínda que en principio pareza que a receita será difícil, xa que leva masa, e sabemos que as masas sen glute adoitan complicarnos un pouco. Neste caso e unha masa crebada moi fácil de elaborar, pode romper pero non pasa nada, facendo un pouco de presión volve unirse. Podemos conxelar a que sobre ou podemos usala para facer galletas.
O recheo é moi sinxelo, ocórrenseme outros moitos para facer: con espinacas, con allos porros, con brócoli, con xamón, etc... O resultado é moi, moi rico.
Ingredientes:
Masa
- 100 g de fariña de arroz
- 60 g de amidón de millo
- 4 g de psyllum moído
- 1 ovo mediano
- 80 g de manteiga fría
- 2 culleres de auga moi fría
Recheo:
- 2 cebolas medianas
- 2 ovos
- 50 ml de leite evaporado
- 1 culleriña de curry
- 30 g de queixo parmesano relado
- Pementa negra moída
- Sal
- Aceite de oliva
Elaboración:
Masa
- Cortar a manteiga en cubos dun cm de lado.
- Mesturar a manteiga, a fariña de arroz, o amidón de millo e o psyllum. Pode facerse a man ou na batedora.
- Cando teñamos como unha especia de area engadir o ovo. Seguir mesturando.
- Se non se forma unha masa compacta engadir unha culleriña de auga e se é necesario engadir máis ata ter unha masa compacta. A cantidade de auga necesaria vai depender do tamaño do ovo.
- Facer unha bóla coa masa e chafala un pouco. Envolvela en flim e gardala na neveira. Ten que repousar polo menos unha hora.
- Esta cantidade de masa dá para 5 tortiñas duns 9 cm de diámetro.
Recheo:
- Cortar as cebolas en xuliana fina e poñelas nunha tixola cun pouco de aceite. Deixar que se fagan despacio a lume suave.
- Cando a cebola estea transparente e branda retirar do lume. Coar para separar a maior cantidade posible de aceite. Reservar a cebola.
- Bater os ovos xunto co leite evaporado, o curry, a pementa e o sal. Engadir o queixo relado. Reservar.
Montaxe:
- Sacar a masa da neveira e estirar cun rolete ata que teña un grosor duns 4 mm.
- Forrar coa masa os moldes e deixalos repousar na neveira uns 20 minutos.
- Sacar os moldes da neveira e poñer enriba da masa algún peso para que non suba ao enfornar. Meter os moldes no forno prequentado a180ºC. Deixalos no forno ata que empecen a dourarse nos bordos.
- Sacar do forno e repartir a cebola cociñada nas tortiñas. Botar en cada unha a mestura de ovos e leite ata enchelas.
- Cortar uns anacos finos de queixo e poñelos por enriba.
- Meter no forno a 180ºC ata que estean douradas, uns 15 minutos.
Comentarios
Publicar un comentario
Encantaríame saber a túa opinión