Quiche de allo porro asado

Eu utilizo moito allo porro para cociñar, gústame moito, e como teño uns estupendos na horta penseí en asalos e facer unha quiche con eles. Este tipo de receitas son moi fáciles de facer e ademais pode cociñarse con antelación e tomarse quente ou a temperatura ambiente. Acompañada dunha ensalada está riquísima.

Ingredientes:

Masa

• 100 g de fariña de arroz
• 60 g de amidón de millo
• 4 g de psyllum moído
• 1 ovo mediano
• 80 g de manteiga fría
• 2 culleres de auga moi fría

Recheo:

• 3 allos porros medianos
• 2 ovos
• 50 ml de leite evaporado
• 30 g de queixo parmesano relado
• Pementa negra moída
• Sal
• Aceite de oliva

Elaboración:

Masa

1. Cortar a manteiga en cubos dun cm de lado.
2. Mesturar a manteiga, a fariña de arroz, o amidón de millo e o psyllum. Pode facerse a man ou na batedora.
3. Cando teñamos como unha especia de area engadir o ovo. Seguir mesturando.
4. Se non se forma unha masa compacta engadir unha culleriña de auga e se é necesario engadir máis ata ter unha masa compacta. A cantidade de auga necesaria vai depender do tamaño do ovo.
5. Facer unha bóla coa masa e chafala un pouco. Envolvela en flime e gardala na neveira. Ten que repousar polo menos unha hora.

Recheo:

1. Poñer os allos porros enteiros nunha bandexa de forno, botarlles un pouco de aceite de oliva.
2. Meter no forno a 180ºC durante uns 20 minutos.
3. Sacar do forno e deixar arrefriar.
4. Retirar as follas de fóra que estean duras.
5. Cortar os allos porros en toros duns 2 cm.
6. Bater os ovos xunto co leite evaporado, a pementa e o sal. Reservar.

Montaxe:

1. Sacar a masa da neveira e estirar cun rolete ata que teña un grosor duns 4 mm.
2. Forrar coa masa un molde desmontable duns 15 cm de diámetro. Deixalo repousar na neveira uns 20 minutos.
3. Sacar o molde da neveira e poñer enriba da masa algún peso para que non suba ao enfornar. Meter o molde no forno prequentado a180ºC.  Deixalos no forno ata que empece a dourarse nos bordos.
4. Sacar do forno e repartir os anacos de allo porro na torta.
5. Botar a mestura de ovos e leite ata enchela.
6. Relar o queixo por enriba.
7. Meter no forno a 180ºC ata que a superficie estea dourada, uns 20 ou 25 minutos.

Dificultade: Media

Tempo aproximado: 1 hora máis os tempos de repouso.

Alérxenos: