Un dos problemas de non poder tomar glute é que o tipo de pasta que se pode comer está moi limitado. Elaborar pasta fresca sen glute é complicado, esta receita está lixeiramente modificada sobre unha que vin o outro día nun vídeo. Neste caso a masa é sinxela e a maior dificultade é estirala moi fina para facer os raviolis, probablemente a próxima vez tentarei facela aínda un pouco máis fina. A verdade que os ravioles, acompañados da bechamel, como indico na suxestión do final, estaban moi ricos así que seguirei experimentando con outro tipo de masa e de recheos.
Ingredientes:
Para a pasta
- 50 g de amidón de millo
- 50 g de fariña de trigo sarraceno
- 1 ovo
- 3 g de Psyllium
- 3 g de xantana
- 40 g de espinacas conxeladas
- 1 dente de allo pequeno
- 1 culleriña de aceite de oliva
- Fariña de arroz para estirar a masa
Para o recheo
- 200 g de requeixo
- Un chisco de sal
- Pementa negra moída ao gusto
Elaboración:
- Deixar desconxelar as espinacas.
- Poñer nunha tixola o aceite e o dente de allo moi picadiño, deixar facer a lume medio baixo.
- Cando o allo empece a coller cor botar as espinacas e remexer, deixar cociñar uns minutos.
- Facer un puré coas espinacas, se é necesario engadir un pouco de auga.
- Mesturar o resto de ingredientes da pasta engadindo 35 g de puré de espinacas. Amasar ata ter unha masa elástica.
- Deixar repousar uns 30 minutos.
- Estender a masa sobre unha superficie enfariñada con fariña de arroz.
- Hai que conseguir un rectángulo cun espesor dun milímetro aproximadamente.
- Mesturar o requeixo co sal e a pementa.
- Ir poñendo culleriñas de requeixo sobre a masa, en montonciños separados, ocupando a metade do rectángulo da masa.
- Cun pincel mollar, con auga , ao redor de cada montonciño de requeixo.
- Tapar a metade que ten o requeixo coa outra metade da masa.
- Presionar para marcar cada ravioli.
- Cortar os raviolis cun corta pasta, como o da foto, ou cun coitelo. Se se fai cun coitelo marcar os bordos para pechar usando un garfo.
- Cocer os raviolis en auga abundante con sal e servir coa salsa preferida.
Suxestión: facer unha bechamel lixeira con fariña de arroz, engadir pementa negra moída ao gusto e unhas lascas de queixo parmesano. Botar sobre os raviolis cocidos e ciscar pistachos picados por enriba.
Dificultade: Media
Tempo aproximado: 1 hora
Alérxenos:
Comentarios
Publicar un comentario
Encantaríame saber a túa opinión