Este ano recollín moitos chícharos da horta. Una vez debullados deume pena tirar as vaíñas, tiñan moi boa pinta, así que decidín probar a facer unha sopa moi sinxela con elas. O resultado foi moi bo, a sopa queda moi saborosa e está igual de rica quente que fría. Os chícharos crus están moi tenros e doces e melloran aínda máis a sopa.
É importante cortar as vaíñas para que as fibras sexan máis curtas xa que poden atascar a coitela da batedora.
Ingredientes:
- 1 cebola
- 1 dente de allo
- 1 póla, duns 10 cm, de apio
- 500 g de vaíñas de chícharos
- Aceite de oliva virxe
- Auga
- Sal
- Pementa negra moída
Elaboración:
- Poñer dúas culleres de aceite a quentar nunha tarteira.
- Pelar e cortar a cebola en anacos medianos e botalos á tarteira.
- Engadir o dente de allo picado e a póla de apio cortada en anacos pequenos.
- Quitarlle as puntas duras ás vaíñas e cortalas en dous ou tres anacos.
- Cando a cebola empece a estar transparente botar un litro de auga á tarteira e despois engadir as vaíñas de chícharos.
- Deixar cocendo uns 10 minutos, vixiando que non perdan a cor verde.
- Triturar todo nun vaso americano e pasar a mestura por un coador para retirar todas as fibras das vaíñas.
- Engadir sal e pementa negra ao gusto.
- Servir con chícharos crus e se se quere con anaquiños de xamón e queixo relado.
- Pode servirse quente ou fría.
Dificultade: Moi fácil
Tempo de elaboración: 30 minutos
Alérxenos:
Comentarios
Publicar un comentario
Encantaríame saber a túa opinión