Curry de coliflor e tofu

Ultimamente estou a buscar receitas con  tofu que teñan moito sabor, xa que o  tofu é totalmente  insípido, polo menos o que podo comprar eu. O  curry está cheo de sabor e é versátil en canto ás especias que se poden utilizar. É unha receita sinxela que se pode preparar con antelación. Pode facerse exactamente  a mesma receita sen utilizar o  tofu, estará igual de rica.

Ingredientes:

• Media coliflor mediana
• 275 g de tofu firme
• 2 dentes de allo
• 1 anaco de xenxibre duns 2 cm
• 200 g de tomate triturado
• 400 ml de leite de coco
• 1 culleriña de coandro triturado
• 1 culleriña de comiño triturado
• 1 culleriña de curry
• 1 culleriña de cúrcuma en po
• Media culleriña de chile seco triturado
• Uns 2 cm de pau de canela
• Unha presa de anacardos naturais
• Sal
• Aceite de oliva virxe
• Unhas follas de coandro
• Uns anacos da parte verde dunha cebola fresca.

Elaboración:

1. Unhas horas antes de empezar a preparación envolver o anaco de tofu con papel de cociña e poñer enriba un peso para que perda auga.
2. Cortar a coliflor en anacos , cortar o tofu en anacos.
3. Poñer a coliflor e o tofu nunha fonte de forno, botarlles un pouco de aceite e metelos no forno a 160ºC ata que collan un pouco de cor torrada.
4. Poñer un pouco de aceite nunha tarteira a lume medio.
5. Engadir o pau de canela e os anacardos.
6. Cando os anacardos empezen a torrar engadir os dentes de allo e o xenxibre triturados, e o resto das especias.
7. Agregar o tomate, remexer e deixar cociñar uns minutos.
8. Botar á tarteira a coliflor e o tofu, remexer e a continuación poñer o leite de coco.
9. Deixar ferver lentamente ata que a coliflor estea feita.
10. Probar e rectificar de sal.
11. Servir poñendo por enriba unhas follas de coandro, uns anacos da parte verde dunha cebola fresca e algúns anacardos tostados.

Dificultade: Moi fácil.

Tempo aproximado: 45 minutos.

Alérxenos: