Empanada de grelos, lacón e queixo

A empanada é unha desas cousas que botas de menos cando non podes tomar glute, e non queda outra que facela ti mesma. Nesta ocasión non quería complicar moito a receita e por iso optei por utilizar preparados panificables. 

A mestura de grelos, lacón e pemento é boísima, se ademais engadimos queixo temos unha combinación que non pode fallar.

Coas cantidades indicadas podemos facer unha empanada duns 30 cm de diámetro.

Ingredientes:

Para a masa:

• 200 g de fariña Mix It Rústico de Schär
• 270 g de fariña Mix B Mix Pan de Schär
• 2 ovos, un para pincelar
• 100 ml de aceite de oliva
• 300 ml de auga
• 1 culleriña de fermento seco
• 1 culleriña de sal

Recheo:

• Unha presa de grelos
• 200 g de lacón cocido cortado en talladas
• 150 g de queixo Arzúa- Ulloa cortado en talladas
• Pemento doce
• 1 cebola mediana
• Aceite de oliva virxe

Elaboración:

Masa:

1. No vaso da amasadora poñemos as dúas fariñas xunto co sal e o fermento sen que se toquen. 
2. Engadir a auga morna, o aceite e un ovo. 
3. Mesturar todo ben ata conseguir unha masa homoxénea, envolvela nun filme e deixala repousar na neveira mentres preparamos o recheo.

Recheo:

1. Poñer auga a ferver nunha tarteira cun pouco de sal.
2. Cocer os grelos ata que estean tenros. Se prefires quitarlles o amargor, cambiar a auga despois de que fervan uns minutos e volver a poñer auga nova a ferver e engadir outra vez os grelos. Se se fai deste xeito engadir o sal na última auga.
3. Sacar os grelos da auga e deixalos escorrer.
4. Picar a cebola e poñela nunha tixola cun pouco de aceite de oliva, facer ao lume suave ata que estea transparente.
5. Picar os grelos en anacos miúdos.
6. Engadir os grelos á tixola coa cebola, remexer e deixar cociñar durante uns minutos.

Montaxe:

1. Dividir a masa en dous anacos iguais.
2. Colocar cada anaco entre dous papeis de enfornar e estirar con axuda dun rodete.
3. Formar dous círculos e reservar. 
4. Colocar unha das masas sobre a bandexa do forno sen retirar o papel da base. Engadir os grelos coa cebola repartíndoos por toda a superficie.
5. Poñer por enriba dos grelos as talladas de lacón e botar un pouco de pemento, por último poñer as talladas de queixo.
6. Tapar coa outra parte da masa e pechar o bordo.
7. Pintar a superficie cun ovo batido.
8. Meter a empanada no forno a 160ºC ata que estea dourada.

Dificultade: Media

Tempo aproximado: 1 hora e 30 minutos

Alérxenos: