Esta receita é unha adaptación da que aparece no libro "El gourmet vegetariano" de Yotam Ottolenghi. É unha receita sinxela, tanto polo ingredientes que leva, como pola súa elaboración, de todos os xeitos cambiei algún ingrediente como, evidentemente, o queixo que na receita orixinal era un queixo italiano, e eu utilicei Arzúa -Ulloa. Pode facerse con cogomelos variados de calquera tipo ou cunha soa variedade.
Ingredientes:
- 350 g de cogomelos variados
- 1 dente de allo
- 1 culleriña de tomiño moído
- 80 g de polenta
- 2 culleres sopeiras de queixo parmesano relado
- 25 g de manteiga
- 1 culler sopeira de perexil picado
- 100 g de queixo Arzúa-Ulloa
- 4 culleres de aceite de oliva virxe
- Sal e pementa negra moída
Elaboración:
- Quentar a metade do aceite nunha tixola , unha vez quente engadir a metade dos cogomelos e cociñalos ata que estean feitos deixando que se douren un pouco.
- Repetir o proceso coa outra metade dos cogomelos.
- Retirar do lume e engadir o allo e o tomiño moi picados. Reservar os cogomelos.
- Cocer a polenta seguindo as instrucións do paquete.
- Cando a polenta estea lista engadir a manteiga, o queixo parmesano, a metade do perexil picado, sal e pementa negra moída.
- Quentar o forno coa grella ao máximo.
- Poñer a polenta nunha fonte resistente á calor e cubrir con anaquiños de queixo Arzúa-Ulloa.
- Meter no forno ata que o queixo empece a dourarse un pouco.
- Sacar do forno e cubrir cos cogomelos, volver meter no forno para quentar.
- Servir quente poñendo o resto do perexil por encima.
Dificultade: Moi fácil
Tempo aproximado: 50 minutos
Alérxenos:
Comentarios
Publicar un comentario
Encantaríame saber a túa opinión