Xeado de chocolate do 70%

Agora que conseguín un estupendo chocolate do 70% (Barry Saint-Domingue) xa podo facer receitas que tiña na reserva. Neste caso a novidade da receita do xeado é que leva "crême fraîche". A receita é unha adaptación do blogue "Mercado Calabajío". 
O xeado está moi rico, non demasiado doce e con todo o sabor do chocolate, os froitos vermellos acompañan de marabilla.




Ingredientes:

300 g de leite, 200 g de crême fraîche, 70 g de chocolate do 70% sen glute, 50 g de cacao puro en po sen glute, 90 g de azucre, 2 xemas de ovos.


Elaboración:

  1. Poñer a quentar o leite e a crême fraîche, remexer para que se mesturen ben sen que cheguen a ferver.
  2. Cando estean ben mesturados o leite e a crême fraîche retirar do lume e engadir o cacao en po, remexer ata que estea unido.
  3. Engadir o chocolate e remexer ata que estea mesturado.
  4. Mesturar as xemas de ovo e o azucre.
  5. Botar un pouco da mestura de chocolate sobre as xemas co azucre para conseguir unha mestura máis líquida.
  6. Botar a mestura de xemas á mestura de chocolate e volver a poñer ao lume.
  7. Remexer continuamente ata que chegue a uns 85ºC. Retirar do lume. Neste momento a mestura ten que ter a consistencia dunha crema lixeira.
  8. Arrefriar rápido e deixar repousar no frigorífico entre 12 e 24 horas.
  9. Pasar o preparado á máquina de xeados*.
  10. Gardar no conxelador. Para consumir sacar un pouco antes do conxelador.


*Pode facerse sen máquina metendo a mestura no conxelador ata que empece a conxelar, entón sácase e bátese, repítese esta operación ata que o xeado quede cremoso.


Dificultade: media
Tempo aproximado: 1º día 1 hora+ 2º dia 2 horas + repouso.
Alérxenos:

Comentarios