luns, 15 de febreiro de 2016

Filloas recheas de puré de cabaza

Non sei se existen pero eu nunca atopei canelóns sen glute, así que utilizo filloas para substituír a pasta. Esta receita é unha copia da que facía unha amiga na súa viñoteca. A crema de cabaza tende a ser un pouco doce penso que non hai que cortarse co sal nin coa pementa, pero hai que ir probando para non pasarse. De cúrcuma mellor quedarse curtos.


Ingredientes:

6 filloas, 1 cabaza pequena, 1 cebola mediana, , 1 culler de manteiga, 2 culleres de amidón de millo (Maizena), 200 ml de leite frio, pementa negra moída, aceite de oliva virxe extra, sal, cúrcuma, pementa negra moída.

Elaboración:


  1. Pelar e cortar a cabaza en anacos non moi grandes.
  2. Pelar e cortar a cebola en anacos pequenos.
  3. Poñer nunha cazola un pouco de aceite, quentalo a lume suave e engadir a cebola.
  4. Cando a cebola estea transparente engadir a cabaza, tapar a cazola e deixar que se faga a lume lento.
  5. De vez en cando remexer, e cando a cabaza estea brandiña ir esmagándoa cun garfo ata ter un puré.
  6. Engadir o sal, a pementa e a cúrcuma ao gusto. Deixar que se siga cociñando a lume lento.
  7. Cando estea feito o puré de cabaza deixar que arrefríe un pouco para poder encher as filloas.
  8. Ir poñendo unhas culleres de puré enriba de cada filloas e facer un rolo, cortar os extremos.
  9. Colocar as filloas recheas nunha fonte para o forno e reservar.
  10. Disolver a maizena nun pouco de leite frío.
  11. Poñer a quentar o resto do leite xunto coa manteiga.
  12. Cando o leite empece a estar quente engadir a maizena disolta e remexer continuamente ata que espese un pouco.
  13. Engadir sal e pementa ao gusto.
  14. Botar a bechamel por enriba das filloas.
  15. Meter a fonte ao forno co gratinador acendido e deixala ata que estean un pouco torradas por enriba.



Dificultade: Media
Tempo aproximado: 1h e media