Empanada de millo e bacallau con pasas sen glute

Esta empanada é das que máis me gusta, as uvas pasas danlle  un puntodoce que fai que sexa moi especial, encantame esta combinación. Coma sempre a gran dificultade da receita está na elaboración da masa sen glute, unha vez superada esta dificultade a receita non é tan complicada.


Ingredientes:

Para a masa: 600 g de fariña milla, 200 g de fariña sen glute (Beiker), 10 g de lévedo seco, 300 g de auga, 120 g de viño branco, 1 ovo, 150 g de aceite de oliva virxe extra, 10 g de sal. Un pouco de leite e unha xema de ovo para pintar. Sobrará masa dependendo do fina que se faga a empanada.
Para o recheo: 3 cebolas medianas, 250 g de bacallau desalgado cocido e separado en lascas, 45 g pemento do "piquillo", 45 g de uvas papas sen pepitas 1 sobre de azafrán, sal, aceite de oliva virxe extra.



Elaboración:

A masa:
  1. Poñer 150 g de auga nun vaso e quentala un pouco, que non pase de 30ºC, engadir o lévedo e deixar repousar ata que teña escuma.
  2. No bol da amasadora poñer as dúas fariñas, o sal, o viño, o aceite e os outros 150 g de auga e o ovo, comezar a amasar.
  3. Engadir o lévedo e seguir amasando.
  4. Terminar de amasar coas mans.
  5. Facer unha bóla coa masa e deixala nun recipiente tapada cun pano húmido e morno. Para manexar a masa untar as mans de aceite e untar tamén o recipiente onde vai repousar. 
  6. Deixar que repouse unha hora ao lado da cociña mentres se fai o recheo.
  7. Dividir a masa en dous anacos, un un pouco máis grande que o outro.
  8. Poñer o anaco de masa máis grande entre dous papeis de forno e estiralo cun rodete, será a base da empanada.
  9. Estirar da mesma maneira o resto da masa para facer a tapa da empanada.

Recheo:
  1. Cortar a cebola en xuliana e poñela a pochar, ao lume suave, cun pouco de aceite.
  2. Cando a cebola estea feita engadir o pemento cortado en anaquiños. Deixar ao lume ata que a cebola e o pemento estean feitos.
  3. Engadir as uvas pasas.
  4. Engadir o azafrán.
  5. Apagar o lume e engadir o bacallau. Remexer.


Montaxe:
  1. Poñer o recheo sobre a masa estirada.
  2. Tapar coa outra masa tamén estirada.
  3. Pechar os bordos da empanada.
  4. Marcar un pouco, cun coitelo, os cortes das racións. A empanada de millo é difícil de cortar sen desfacela.
  5. Meter no forno quente, a 180ºC, durante 40 minutos.
  6. Abrir o forno e pintar a superficie da empanada cunha xema de ovo mesturada cun pouco de leite.
  7. Deixar no forno outros 15 minutos.




Dificultade: Alta.

Tempo aproximado: 2 horas.