Risotto de algas e vieiras

Ingredientes:

200 g de arroz redondo (poñer aproximadamente 100 g por persoa), 1 cenoria, a parte branca dun allo porro non moi grande, 2 dentes de allo pequenos,  6 vieiras (3 ou 4 por persoa, dependendo do tamaño),  10 g de mestura de algas secas (leituga de mar, wakame, nori, espagueti de mar, ), 100 ml de viño Fino seco, 500 ml de auga da cocción dun kg de mexillóns (reservar os mexillóns para outra receita), 500 ml de auga mineral, 3 culleres de aceite de oliva virxe extra, 50 g de queixo parmesano relado, pementa negra moida, o zume de 2 limóns.

Elaboración:

1. Poñer as algas a remollo.
2. Limpar as vieiras e quitarlles o "coral", reservar.
3. Poñer os corpos da vieiras en zume de limón e reservar.
4. Relar a cenoria, o allo porro e os dentes de allo. Poñer todo nunha tarteira coas 3 culleres de aceite. Deixar facer a lume suave.
5. Cando o allo porro empece a estar transparente engadir o "coral" das vieiras picado fino.
6. Engadir as algas ben escorregadas e picadas. Remexer.
7. Engadir o arroz e remexer ate que empece a estar transparente.
8. Engadir o viño e a metade da auga da cocción dos mexillóns.
9. Remexer continuamente e deixar facer a lume suave.
10. Ir engadindo a auga do mexillóns e a auga mineral a medida que sexa necesario. Dependendo do tipo de arroz pode ser necesario engadir máis líquido, se é así engadir máis auga mineral.
11. Engadir pementa negra ao gusto e o queixo relado, remexer.
12. Cando o arroz estea practicamente feito poñer unha tixola ao lume, cun pouco de aceite, escorregar as vieras do zume de limón e marcalas polas dúas caras pero sen facelas moito.
13. Servir o arroz acompañado das vieiras.

Dificultade: Fácil.
Tempo aproximado: 45 minutos